முகம் திருத்துதல்

மேல் பெர்த்தில் இருந்து
இறக்கி விட்டதற்காக
அம்மாவிடம் கோபித்துக் கொண்டு
முகத்தைத் திருப்பிப் படுத்துக் கொண்டவள்
ஐந்து நிமிஷத்தில் அப்படியே
தூங்கியும் விட்டாள்.
கோபமாகத் தூங்குகிற மகளை
கொஞ்ச நேரம் வேடிக்கை பார்த்த
அவள் அம்மா அப்புறம்
போர்வையை ஒழுங்கு செய்வது போல்
மகளின் முகத்தை சரி செய்து விட்டாள்.
தூக்கம் கலையாமல்
பட்டுப் பாவாடையை கழற்றி விட்டு
பழைய கவுனை அணிவிப்பது போல
அத்தனை எளிதாக.

(c) veenaapponavan@yahoo.com

அழுகுரல் ஊஞ்சல்

அழும் குழந்தையை
தூக்கி வைத்துக் கொண்டு
முன்னும் பின்னும்
நடந்து கொண்டிருந்தனர்
ஓடும் ரயிலில்.
மேல் பெர்த்தில்
அழுகுரல் ஊஞ்சலில்
ஆடிக்கொண்டே
தூங்க ஆரம்பித்தேன் நான்.

(c) veenaapponavan@yahoo.com

ஒரு இரவுக்கான கூடு

பிள்ளைகளுடன் மேல் பெர்த்துக்குப்
போன அம்மா
சாப்பாட்டுப் பொட்டலத்தைப் பிரித்து
ஊட்டி விட ஆரம்பித்தாள்.
அப்பா குருவி வெளியே போய்
தண்ணீர் பாட்டில் வாங்கி வந்தது.
ஒரு இரவுக்கான கூடு
உருவாகியிருந்தது
ரயில் கிளம்புவதற்கு முன்னால்.

(c) veenaapponavan@yahoo.com