ப்ரிஸில்லாவை அணைத்தல்

காசு கொடுத்த போது
பெயர் கேட்கத் தோன்றவில்லை.
அணைத்துக் கொள்ளும் போது
பெயர் அவசியமாக இருந்தது.
ஒரு கணம் யோசித்து
ப்ரிஸில்லா என்றாள்.
அவளை அணைத்து முடிக்க
அந்தப் பெயரின் நீளம் போதவில்லை.
ப்ரிஸில்லா ப்ரிஸில்லாவாக
மாற்றி மாற்றி வைத்து
அணைத்து முடித்தேன்.

(c) veenaapponavan@yahoo.com

கிளிக் கதை

ஞாயிற்றுக் கிழமை காலைக்காட்சி
கூட்டம் குறைவாக இருந்த
மலையாளப் படத்துக்கு
தன் கிளியுடன் வந்திருந்தான்
பஸ் ஸ்டாண்ட் கிளி ஜோசியக்காரன்.
அவ்வபோது கிளியின் குரல்
கேட்டுக் கொண்டிருந்தது தியேட்டரில்.
படம் முடிந்து போகும்போது
கூண்டுக்குள் சிதறிக் கிடந்த
பாப்கார்னை பார்த்துக் கொண்டு
சோர்வாக உட்கார்ந்திருந்தது கிளி.

(c) veenaapponavan@yahoo.com