விளம்பர இடைவேளைக்கு நடுவே

பித்துப் பிடித்த மனநிலையின்
உச்சத்தில் பிறந்த
கவிதைகளின் தொகுப்பு என
கவிஞன் சொல்லி இருந்தான்
தன் முன்னுரையில்.
இடம், தேதி குறிப்பிட்டு
முடித்திருந்த
அந்த முன்னுரைக்குக் கீழே
கவிதைகள் வெளியான
இதழ்களின் பெயர்களும்,
புத்தகத் தயாரிப்பில்
உறுதுணையாக இருந்த
நண்பர்களின் பெயர்களும்
பட்டியலிடப்பட்டு இருந்தன.
ஒழுங்கு கலைந்த மனத்தின்
பேச்சாக விரிந்த
கவிதைகளுக்கு நடுவே
புத்தகத்தின் பெயரும்,
பக்க எண்ணும்,
கவிஞன் பெயரும்
ஓயாமல் வந்து கொண்டிருந்தன
விளம்பர இடைவேளைகளைப் போல.

(C) veenaapponavan@yahoo.com